Invest North Macedonia mori pjesë aktive në forumin e biznesit Maqedonia e Veriut – Kazakistani, i cili u mbajt në Shkup, duke bashkuar përfaqësues të institucioneve dhe komuniteteve të biznesit të Maqedonisë së Veriut dhe Kazakistanit. Ngjarja përfaqësonte një platformë të rëndësishme për avancimin e bashkëpunimit ekonomik dhe hapjen e perspektivave të reja për investime dhe tregti.
Forumi u hap zyrtarisht nga zëvendësministri për punë të jashtme dhe tregti të jashtme i Maqedonisë së Veriut, Zoran Dimitrovski, dhe ministri i tregtisë dhe integrimit të Republikës së Kazakistanit, Arman Shakaliev. Në fjalimet e tyre u theksua rëndësia e thellimit të marrëdhënieve ekonomike, rritjes së shkëmbimit tregtar dhe krijimit të kushteve të qëndrueshme për bashkëpunim afatgjatë.
Në kuadër të forumit u nënshkrua një Memorandum Bashkëpunimi ndërmjet Invest North Macedonia dhe QazTrade, nga drejtori Refik Xhemaili. Me këtë dokument vendoset një kornizë e fortë institucionale për avancimin e investimeve dhe eksportit, përmes shkëmbimit të informacionit ekonomik, praktikave të mira dhe aktiviteteve të përbashkëta të orientuara drejt lehtësimit të qasjes së kompanive në tregje të reja.
Gjithashtu, u nënshkrua një Marrëveshje për themelimin e një Këshilli Biznesor ndërmjet Odës Ekonomike të Maqedonisë së Veriut dhe Odës për Tregti Ndërkombëtare të Kazakistanit. Kjo iniciativë hap kanale të reja për komunikim të drejtpërdrejtë ndërmjet kompanive dhe krijon parakushte për zhvillimin e partneriteteve afatgjata dhe të qëndrueshme biznesore.
Gjatë forumit, këshilltari shtetëror Igor Velevski prezantoi potencialet investuese dhe eksportuese të Maqedonisë së Veriut, ku u theksuan avantazhet kryesore konkurruese: klima e favorshme e biznesit, pozita strategjike gjeografike, qasja në tregjet rajonale dhe ndërkombëtare, si dhe paketa e masave dhe mbështetjes për investitorët e huaj.
Forumi përfshiu edhe një segment dinamik të takimeve bilaterale të biznesit, ku kompanitë nga Maqedonia e Veriut dhe Kazakistani patën mundësi të krijojnë kontakte të drejtpërdrejta dhe të shqyrtojnë mundësi konkrete për bashkëpunim. Interes i veçantë u tregua në sektorët e industrisë, agrobiznesit, energjetikës dhe infrastrukturës, gjë që tregon për spektrin e gjerë të potencialit për investime të përbashkëta.
Ky forum biznesi edhe një herë konfirmoi potencialin e rëndësishëm për thellimin e marrëdhënieve ekonomike ndërmjet Maqedonisë së Veriut dhe Kazakistanit, duke vendosur bazat për projekte konkrete dhe iniciativa investuese në të ardhmen.
Invest North Macedonia mbetet e përkushtuar në tërheqjen e investimeve të reja, mbështetjen e kompanive të orientuara drejt eksportit dhe krijimin e kushteve për rritje dhe zhvillim të qëndrueshëm ekonomik.
